ஒரே நாளில்

 

நீ என் காதலை மறுத்த
அதே நாள் மாலை
எங்கள் தெரு சலவைக்கடை
இடம் மாறி
வெகு தொலைவுக்குச் சென்றது.
இப்படி
ஒரே நாளில்
எல்லோரும் என்னைக்
கை விட்டால் எப்படி?

– முகுந்த் நாகராஜன்

Advertisements

மூன்றாமவன்


தன் வகுப்பு மாணவர்களின்
எண்ணிக்கை,
பத்தாவது பொதுத்தேர்வு எண்,
மொத்த மதிப்பெண்,
போக்குவரத்துச் சந்திப்பில்
முன்னால் நிற்கும் வாகனத்தின்
பதிவு எண்,
வங்கிக் கணக்கு எண்,
முன்பதிவுசெய்த 
ரயில் வண்டி இருக்கை எண்,
கிரேக்க நாட்டின்
மொத்தக் கடன் தொகை,
வீட்டுக்கடனுக்கான மாதத்தவணை,
நாட்டில் உள்ள
பொறியியல் கல்லூரிகள் எண்ணிக்கை,
நகரின் வெப்பநிலை,
இதுவரை எண்ணிய அலைகளின்
எண்ணிக்கை
என
எந்த எண்ணைப் பார்த்தாலும்
மூன்றால் வகுபடுகிறதா என்று
சோதித்துப்பார்த்துவிடுகிறான்,
மூன்று பிள்ளைகளில்
ஒருவனாகப் பிறந்தவன்.

- முகுந்த் நாகராஜன்